બ્રહ્મસ્વરૂપ શાસ્ત્રીજી મહારાજ સ્મૃતિપર્વ

તા. ૨૭-૯-૨૦૧૦ના રોજ બી.એ.પી.એસ. સ્વામિનારાયણ સંસ્થાના સંસ્થાપક બ્રહ્મસ્વરૂપ શાસ્ત્રીજી મહારાજના સ્મૃતિ પર્વ પ્રસંગે પરમ પૂજ્ય પ્રમુખસ્વામી મહારાજે ગુરુહરિનાં ચરણોમાં ભાવઅર્ઘ્ય અર્પણ કરી અનન્ય ગુરુભક્તિ અદા કરી હતી. દૂર-સુદૂરથી આ પ્રસંગનો લાભ લેવા ૧૧,૦૦૦થી વધુ હરિભક્તો-ભાવિકો ઊમટ્યા હતા. પ્રાતઃ સમયથી જ શાસ્ત્રીજી મહારાજનાં સંસ્મરણો સાથે આ સ્મૃતિ પર્વનો આરંભ થયો. મંદિરના પ્રત્યેક સ્મૃતિવિરામમાં શાસ્ત્રીજી મહારાજનાં વિરલ કાર્યોને ભાવાંજલિ અર્પતાં દૃશ્યો રચવામાં આવ્યાં હતાં. મંદિરના મધ્ય-ખંડમાં અક્ષરબ્રહ્મ ગુણાતીતાનંદ સ્વામી અને પરમહંસોને ભગવાન સ્વામિનારાયણ દૂધપાક પીરસતા હોય એવું સુંદર દૃશ્ય રચવામાં આવ્યું હતું. સ્મૃતિ મંદિરની પ્રદક્ષિણામાં મહિલા સત્સંગમંડળે ભક્તિ-ભાવપૂર્વક શાસ્ત્રીજી મહારાજના દિવ્ય પ્રસંગોને આવરી લેતી કલાત્મક રંગોળી રચી હતી. અહીં શાસ્ત્રીજી મહારાજની ઉત્સવમૂર્તિ દૂધપાક પીરસી રહી હોય તેવું દૃશ્ય સૌના આકર્ષણનું કેન્દ્ર બન્યું હતું.